بیر شعر عزیز دوستوم : محمدرضا لوایی ده ن

بو پویما ایتحاف اولونور بوتون اونلارا کی : صنعتکار اؤلومونو ایسته ییرلر !

بورا خسته‌خانا بئشینجی اوتاق

یانلیز ایکی خسته واردی بورادا

بیرینجی خسته ده ایکینجی سایاق

غرق اولوب قالیبدی گئنیش دونیادا

بیرنجی قاپی‌نین آغزیندا یاتمیش

گوردوگی دوواردی گوردوگی دووار

پنجره یانیندا ایکینجی خسته

گورور پنجره‌د‌ن آمّا هر نه وار

ازلده‌ن اینسانین قانلی‌سی اینسان

قالمیش انسانلارین باختینا حسرت

ائله بورادادا البت قالیبدی

بیرینجی ایکینجی تاختینا حسرت

حیاتی گورمه‌د‌ن یورولان اینسان

یئرینده بیر باخیش محتاجی اولور

باخیش دا گول کیمی حیات باغیندا

واختیندا آچلیر واختیندا سولور

ایچینده دئیه‌رک اؤزو ـ اؤزونه :

یاتایدم او تاختین اوسته کِشکه من

سورور ایکینجی‌د‌ن بیرینجی خسته :

ایندی پنجره‌دن نه لر گؤرورسن ؟

سسله‌نیر اوجادان ایکینجی خسته :

گؤروره م آرابا ، گؤروره م اینسان

بورادان باخاندا شه‌هه‌ره سانکی

ناری ایکی بؤلوب یئره قویموسان

بیر قیز بیر اوغلانلا قول ـ بویون گلیر

زوغ آتمیش چیگنینده سئوینچ قول‌لاری

گئجه‌نین بو واختی آغ آرابالار

سوکیمی ایچیرلر قارا یول‌لاری

بوتایدان اوتایا خیاوان ایچره

بیر قوجا سووشور آغیر گؤروره‌م

حووضون آراسیندا پارکین ایچینده

یاغیش یئردن گؤیه یاغیر گوروره‌م

چیراقلار آلیشیر گؤزلرین کیمی

گئجه هر بیر شی‌یه معنا وئریبدیر

بیر باخ ! پنجره‌ده بیزد‌ن آشاغی

انسانلاردا اسیر ، گئجه‌ده اسیر

داریخما نه قدر تاخت اوستونده سن

سنه گؤز اولارام ، قولاق اولارام

داریخما نه گؤرسه‌م بو پنجره دن

سنه تعریف له‌رم من سحر ـ آخشام

بورا خسته خانا بئشینجی اوتاق

کیم باسسا آیاغین بو دار اوتاغا

گؤره ر ایکی خسته ، ایکی مهربان

بیری گؤزه دؤنوب بیری قولاغا

ایکینجی دئدیکجه گؤردوکلرینی

حیات رنگه دولور بیرینجی سینده

اوگؤردوکلرینی دئدیکجه بوندا

یارانیرسئوینج ده ، یارانیر کین ده

قفیلدن بیر گئجه ایکینجی خسته

قارالیر آزقالیر نفس گلمه سین

بوغونتو بیر سسله اوبیرینجی یه

دئیر : باراماغینلا باس زنگ دویمه سین

بیرینجی خسته ده آمّا بیر خیال

ائدیر اوره گینین ایچینده دویون

او بونو چاغیریر کؤمه گه ، بودا

هله فیکیر چکیر جنایت اوچون !

ایکینجی خسته یه بو بیرینجی‌نین

بیردن نه اولدوکی اوره‌گی اَسمیر

زنگین دویمه سینی باسماغا ، نه دن

انسانلیق تله سمیر ؟ بارماق تله سمیر ؟

او گؤردوک لرینی هر آن دئیه ره ک

بونا حیات وئریب بونا جان وئریب

بو آمّا «نرسی» نی خبر ائتمه‌گی

اونا آرتیق گؤروب ، اونا چوخ گؤروب !

بو زنگ دویمه سینی باسمیرکی بلکه

او اؤلسون بو اونون تاختیندا یاتسین

ایشده بئله اولورکی ایکینجی خسته

اؤلورکی بیرینجی مطلبه چاتسین

داها نه ایستیر آرتیق حیاتدان

گؤتوروب بیر گئجه بونو سالیرلار

پنجره یانیندا تاختین اوستونه

بودا تله‌سیر کی گؤرسون هر نه وار

دا ایندی اؤزو هر نه یی گؤره‌ر

داها گرگی یوخ آیریسی هر آن

باخیب پنجره‌دن شه‌هره ، چؤله

دئسین گؤردوگوندن ، دئسین حیاتدان

داها گؤره جکدیر خیاوانلاری

گؤره جک هرنه‌یی اؤز گؤزو ایله

زحمتله عذابلا قوزانیر بلکه

باخسین پنجره‌دن ائشیگه ، ائله

باخیشی ائشیگه ساتاشماق همین

سانکی اوره‌گینه تاخیلیر بیر اوخ

پنجره اؤنونده یانلیز بیر بؤیوک

سیمیت دووار گؤرور ! داها هئچ نه یوخ

بورا خسته خانا بئشینجی اوتاق ...